ਟਾਟਾ ਕਰਵ ਡਾਰਕ ਐਡੀਸ਼ਨ ਭਾਰਤ 'ਚ ਲਾਂਚ, ਕੀਮਤ 16.50 ਲੱਖ ਤੋਂ 22.25 ਲੱਖ ਰੁਪਏ

ਟਾਟਾ ਦੀ ਨਵੀਂ ਈਵੀ ਕਾਰ ਕਰਵ ਦੇ ਕੂਪ ਡਿਜ਼ਾਈਨ ਨੇ ਬਾਜ਼ਾਰ ਵਿੱਚ ਧੂਮ ਮਚਾ ਦਿੱਤੀ ਹੈ। ਹੁਣ ਭਾਰਤੀ ਬਾਜ਼ਾਰ 'ਚ ਤੂਫਾਨ ਲਿਆਉਣ ਲਈ ਟਾਟਾ ਨੇ ਕਰਵ ਦਾ ਡਾਰਕ ਐਡੀਸ਼ਨ ਲਾਂਚ ਕੀਤਾ ਹੈ। ਇਸ ਐਡੀਸ਼ਨ 'ਚ ਕਾਰ ਨੂੰ ਬਲੈਕ ਥੀਮ 'ਤੇ ਪੇਸ਼ ਕੀਤਾ ਗਿਆ ਹੈ। ਕਾਰ 'ਚ ਬਲੈਕ ਅਲਾਇ ਵ੍ਹੀਲਜ਼, ਬਲੈਕ ਗ੍ਰਿਲ ਕਾਰ ਨੂੰ ਹੋਰ ਸ਼ਾਨਦਾਰ ਬਣਾਉਂਦੀ ਹੈ। ਨਾਲ ਹੀ ਸਪੋਰਟਸ ਲੁੱਕ ਦੇਣ ਲਈ ਟੇਲਲਾਈਟ 'ਚ ਸਮੋਕਡ ਇਫੈਕਟ ਦਿੱਤਾ ਗਿਆ ਹੈ। ਦੱਸ ਦੇਈਏ ਕਿ ਕਰਵ ਤੋਂ ਪਹਿਲਾਂ ਟਾਟਾ ਆਪਣੇ ਆਲੀਸ਼ਾਨ ਵਾਹਨਾਂ ਪੰਚ, ਨੇਕਸਨ, ਹੈਰੀਅਰ ਅਤੇ ਸਫਾਰੀ 'ਚ ਡਾਰਕ ਐਡੀਸ਼ਨ ਵੀ ਲਾਂਚ ਕਰ ਚੁੱਕੀ ਹੈ। ਹੁਣ ਕਰਵ ਦਾ ਨਾਮ ਵੀ ਇਸ ਸੂਚੀ ਵਿੱਚ ਸ਼ਾਮਲ ਹੋ ਗਿਆ ਹੈ।

ਟਾਟਾ ਕਰਵ ਡਾਰਕ ਐਡੀਸ਼ਨ ਦੀ ਕੀਮਤ

ਟਾਟਾ ਨੇ ਕਰਵ ਡਾਰਕ ਐਡੀਸ਼ਨ 'ਚ ਦੋ ਟਾਪ ਵੇਰੀਐਂਟ ਪੇਸ਼ ਕੀਤੇ ਹਨ, ਪਰਕੰਪਲੀਟ ਐੱਸ ਅਤੇ ਕੰਪਲੀਟਡ +ਏ। ਦੋਵੇਂ ਵੇਰੀਐਂਟ ਆਲ ਬਲੈਕ ਥੀਮ 'ਤੇ ਆਧਾਰਿਤ ਹਨ। ਕੀਮਤ ਦੀ ਗੱਲ ਕਰੀਏ ਤਾਂ ਇਸ ਕਾਰ ਦੀ ਐਕਸ-ਸ਼ੋਅਰੂਮ ਕੀਮਤ ਲਗਭਗ 16.50 ਲੱਖ ਰੁਪਏ ਤੋਂ ਸ਼ੁਰੂ ਹੁੰਦੀ ਹੈ। ਇਸ ਦੀ ਵੱਧ ਤੋਂ ਵੱਧ ਐਕਸ-ਸ਼ੋਅਰੂਮ ਕੀਮਤ 22.25 ਲੱਖ ਰੁਪਏ ਰੱਖੀ ਗਈ ਹੈ।

ਟਾਟਾ ਕਰਵ ਡਾਰਕ ਐਡੀਸ਼ਨ ਦੇ ਫੀਚਰਜ਼

ਟਾਟਾ ਕਰਵ ਡਾਰਕ ਐਡੀਸ਼ਨ ਨੂੰ ਬਲੈਕ ਥੀਮ ਦੇ ਨਾਲ ਪ੍ਰੀਮੀਅਮ ਇੰਟੀਰੀਅਰ ਮਿਲਦਾ ਹੈ। ਇੰਫੋਟੇਨਮੈਂਟ ਫੀਚਰਜ਼ 'ਚ 12.3 ਇੰਚ ਦੀ ਸਕ੍ਰੀਨ, 10.25 ਇੰਚ ਦੀ ਡਰਾਈਵਰ ਸਕ੍ਰੀਨ, ਪੈਨੋਰਮਿਕ ਸਨਰੂਫ, ਜੇਬੀਐਲ ਦਾ ਮਿਊਜ਼ਿਕ ਸਿਸਟਮ, ਹਵਾਦਾਰ ਸੀਟਾਂ, ਕਲਾਈਮੇਟ ਕੰਟਰੋਲ, ਵਾਇਰਲੈੱਸ ਚਾਰਜਰ ਸ਼ਾਮਲ ਹਨ। ਸੁਰੱਖਿਆ ਲਈ ਟਾਟਾ ਕਰਵ ਡਾਰਕ ਐਡੀਸ਼ਨ ਨੂੰ ਲੈਵਲ-2 ਏਡੀਏਐਸ, ਟੀਪੀਐਮਐਸ, 360 ਡਿਗਰੀ ਕੈਮਰਾ, 6 ਏਅਰਬੈਗ ਅਤੇ 5 ਸਟਾਰ ਰੇਟਿੰਗ ਨਾਲ ਲਾਂਚ ਕੀਤਾ ਗਿਆ ਹੈ।