ਗੈਰੀ ਕਰਸਟਨ ਨੇ ਪਾਕਿਸਤਾਨ ਦੇ ਕੋਚ ਦੇ ਅਹੁਦੇ ਤੋਂ ਦਿੱਤਾ ਅਸਤੀਫਾ
ਪਾਕਿਸਤਾਨ ਕ੍ਰਿਕਟ ਟੀਮ ਦੇ ਮੁੱਖ ਕੋਚ ਗੈਰੀ ਕਰਸਟਨ ਨੇ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇਣ ਦਾ ਐਲਾਨ ਕੀਤਾ ਹੈ। ਪਾਕਿਸਤਾਨ ਦੇ ਵ੍ਹਾਈਟਬਾਲ ਕੋਚ ਵਜੋਂ ਉਨ੍ਹਾਂ ਦਾ ਇਕਰਾਰਨਾਮਾ 2 ਸਾਲ ਦਾ ਸੀ, ਜੋ ਸਿਰਫ 6 ਮਹੀਨਿਆਂ ਵਿੱਚ ਹੀ ਖਤਮ ਹੋ ਗਿਆ। ਦੱਸਿਆ ਜਾ ਰਿਹਾ ਹੈ ਕਿ ਉਨ੍ਹਾਂ ਦੇ ਅਸਤੀਫੇ ਦਾ ਕਾਰਨ ਬੋਰਡ ਨਾਲ ਉਨ੍ਹਾਂ ਦਾ ਮਤਭੇਦ ਹੈ।
ਰਿਪੋਰਟ ਮੁਤਾਬਕ ਦੱਖਣੀ ਅਫਰੀਕਾ ਦੇ ਸਾਬਕਾ ਕ੍ਰਿਕਟਰ ਗੈਰੀ ਕਰਸਟਨ ਨੇ ਟੀਮ ਦੀ ਚੋਣ ਅਤੇ ਆਸਟਰੇਲੀਆ ਅਤੇ ਜ਼ਿੰਬਾਬਵੇ ਖਿਲਾਫ ਆਗਾਮੀ ਸੀਰੀਜ਼ ਲਈ ਟੀਮ ਦੇ ਐਲਾਨ ਨੂੰ ਲੈ ਕੇ ਪਾਕਿਸਤਾਨ ਕ੍ਰਿਕਟ ਬੋਰਡ (ਪੀਸੀਬੀ) ਨਾਲ ਅਸਹਿਮਤੀ ਜਤਾਈ। ਇਹ ਮਤਭੇਦ ਉਦੋਂ ਹੋਰ ਵਧ ਗਿਆ ਜਦੋਂ ਪੀਸੀਬੀ ਨੇ ਕਥਿਤ ਤੌਰ 'ਤੇ ਗੈਰੀ ਕਰਸਟਨ ਦੇ ਟੀਮ ਬਾਰੇ ਸੁਝਾਵਾਂ 'ਤੇ ਧਿਆਨ ਨਹੀਂ ਦਿੱਤਾ, ਜਿਸ ਕਾਰਨ ਉਨ੍ਹਾਂ ਨੇ ਮੁੱਖ ਕੋਚ ਦੇ ਅਹੁਦੇ ਤੋਂ ਅਸਤੀਫਾ ਦੇਣ ਦਾ ਫੈਸਲਾ ਕੀਤਾ।
ਸੂਤਰਾਂ ਨੇ ਆਈਏਐਨਐਸ ਨੂੰ ਦੱਸਿਆ, "ਪੀਸੀਬੀ ਨੇ ਇਹ ਤਰੀਕਾ ਉਦੋਂ ਅਪਣਾਇਆ ਜਦੋਂ ਉਸ ਦੀ ਨਵੀਂ ਚੋਣ ਕਮੇਟੀ ਨੇ ਟੈਸਟ ਕੋਚ ਜੇਸਨ ਗਿਲੇਸਪੀ ਅਤੇ ਕਪਤਾਨ ਸ਼ਾਨ ਮਸੂਦ ਨੂੰ ਟੀਮ ਚੋਣ ਵਿੱਚ ਸ਼ਾਮਲ ਕਰਨ ਤੋਂ ਇਨਕਾਰ ਕਰ ਦਿੱਤਾ। ਚੋਣ ਕਮੇਟੀ ਦਾ ਰਵੱਈਆ ਜੇਸਨ ਗਿਲੇਸਪੀ ਨੂੰ ਪਸੰਦ ਨਹੀਂ ਆਇਆ ਸੀ। ਦੂਜੇ ਪਾਸੇ ਗੈਰੀ ਕਰਸਟਨ ਨੇ ਵੱਖਰਾ ਰਸਤਾ ਅਪਣਾਉਂਦੇ ਹੋਏ ਆਪਣੇ ਅਸਤੀਫੇ ਦਾ ਐਲਾਨ ਕਰ ਦਿੱਤਾ ਹੈ।
ਦੱਖਣੀ ਅਫਰੀਕਾ ਦੇ ਸਾਬਕਾ ਖੱਬੇ ਹੱਥ ਦੇ ਬੱਲੇਬਾਜ਼ ਗੈਰੀ ਕਰਸਟਨ ਨੂੰ ਅਪ੍ਰੈਲ 2024 ਵਿੱਚ ਦੋ ਸਾਲ ਦੇ ਇਕਰਾਰਨਾਮੇ 'ਤੇ ਪਾਕਿਸਤਾਨ ਦਾ ਵ੍ਹਾਈਟ ਬਾਲ ਕੋਚ ਨਿਯੁਕਤ ਕੀਤਾ ਗਿਆ ਸੀ। ਹਾਲਾਂਕਿ ਟੀ-20 ਵਿਸ਼ਵ ਕੱਪ ਮੁਹਿੰਮ 'ਚ ਪਾਕਿਸਤਾਨ ਟੀਮ ਦੇ ਖਰਾਬ ਪ੍ਰਦਰਸ਼ਨ ਨੇ ਉਨ੍ਹਾਂ ਦੀ ਨਿਯੁਕਤੀ 'ਤੇ ਗੰਭੀਰ ਸਵਾਲ ਖੜ੍ਹੇ ਕਰ ਦਿੱਤੇ ਸਨ। ਸੂਤਰਾਂ ਦਾ ਕਹਿਣਾ ਹੈ ਕਿ ਕਰਸਟਨ ਦੀ ਥਾਂ ਪਾਕਿਸਤਾਨ ਦੇ ਸਾਬਕਾ ਕ੍ਰਿਕਟਰ ਅਕਿਬ ਜਾਵੇਦ ਨੂੰ ਕੁਝ ਸਮੇਂ ਲਈ ਕੋਚ ਬਣਾਇਆ ਜਾ ਸਕਦਾ ਹੈ। ਗੈਰੀ ਕਰਸਟਨ ਆਸਟਰੇਲੀਆ ਦੌਰੇ 'ਤੇ ਟੀਮ ਦੇ ਨਾਲ ਨਹੀਂ ਹੋਣਗੇ ਅਤੇ ਉਮੀਦ ਕੀਤੀ ਜਾ ਰਹੀ ਹੈ ਕਿ ਉਹ ਕਈ ਫਰੈਂਚਾਇਜ਼ੀ ਟੀਮਾਂ ਨਾਲ ਦੁਨੀਆ ਭਰ 'ਚ ਆਪਣੀ ਕੋਚਿੰਗ ਡਿਊਟੀ 'ਤੇ ਵਾਪਸੀ ਕਰਨਗੇ। ਗੈਰੀ ਕਰਸਟਨ ਦੇ ਅਸਤੀਫੇ ਤੋਂ ਸਪੱਸ਼ਟ ਹੈ ਕਿ ਉਹ ਹੁਣ ਆਸਟਰੇਲੀਆ ਦੌਰੇ 'ਤੇ ਟੀਮ ਨਾਲ ਨਹੀਂ ਰਹਿਣਗੇ। ਅਜਿਹੇ 'ਚ ਵੱਡਾ ਸਵਾਲ ਇਹ ਹੈ ਕਿ ਪਾਕਿਸਤਾਨ ਦਾ ਅਗਲਾ ਵ੍ਹਾਈਟ ਬਾਲ ਕੋਚ ਕੌਣ ਹੋਵੇਗਾ?
