Asia Cup 2025 ਵਿੱਚ ਪਾਕਿਸਤਾਨ ਕ੍ਰਿਕਟ ਟੀਮ ਦੇ ਮਾੜੇ ਪ੍ਰਦਰਸ਼ਨ ਬਾਰੇ ਕਈ ਸਵਾਲ ਉਠਾਏ ਜਾ ਰਹੇ ਹਨ। ਟੀਮ ਦੀ ਰਣਨੀਤੀ ਅਤੇ ਖਿਡਾਰੀਆਂ ਦੀ ਚੋਣ ਬਾਰੇ ਬਹਿਸ ਤੇਜ਼ ਹੋ ਗਈ ਹੈ, ਖਾਸ ਕਰਕੇ ਭਾਰਤ ਖ਼ਿਲਾਫ਼ ਲਗਾਤਾਰ ਦੋ ਮੈਚ ਹਾਰਨ ਤੋਂ ਬਾਅਦ। ਇਸ ਦੌਰਾਨ, ਪਾਕਿਸਤਾਨ ਦੇ ਸਾਬਕਾ ਤੇਜ਼ ਗੇਂਦਬਾਜ਼ ਸ਼ੋਏਬ ਅਖਤਰ ਨੇ ਕਿਹਾ ਹੈ ਕਿ ਜੇਕਰ ਮੌਕਾ ਦਿੱਤਾ ਜਾਵੇ ਤਾਂ ਉਹ ਟੀਮ ਨੂੰ ਬਿਹਤਰ ਦਿਸ਼ਾ ਵਿੱਚ ਲੈ ਜਾ ਸਕਦਾ ਹੈ।
ਪਾਕਿਸਤਾਨੀ ਖਿਡਾਰੀਆਂ ਨੂੰ ਲੋੜ ਹੁੰਦੀ ਹੈ ਆਤਮਵਿਸ਼ਵਾਸ ਅਤੇ ਸਮਰਥਨ ਦੀ
ਅਖਤਰ ਨੇ ਅੱਗੇ ਕਿਹਾ ਕਿ ਪਾਕਿਸਤਾਨੀ ਖਿਡਾਰੀ ਦਬਾਅ ਹੇਠ ਖੇਡਦੇ ਹਨ ਅਤੇ ਉਨ੍ਹਾਂ ਨੂੰ ਭਾਰਤੀ ਖਿਡਾਰੀਆਂ ਵਾਂਗ ਸਮਰਥਨ ਨਹੀਂ ਮਿਲਦਾ। ਨੌਜਵਾਨ ਭਾਰਤੀ ਬੱਲੇਬਾਜ਼ ਅਭਿਸ਼ੇਕ ਸ਼ਰਮਾ ਅਤੇ ਪਾਕਿਸਤਾਨੀ ਬੱਲੇਬਾਜ਼ ਸੈਮ ਅਯੂਬ ਦੀ ਤੁਲਨਾ ਕਰਦੇ ਹੋਏ, ਉਨ੍ਹਾਂ ਕਿਹਾ ਕਿ ਸੈਮ ਵਿੱਚ ਪ੍ਰਤਿਭਾ ਹੈ, ਪਰ ਉਹ ਡਰਿਆ ਹੋਇਆ ਜਾਪਦਾ ਹੈ।
"ਸੈਮ ਅਯੂਬ ਨੂੰ ਆਤਮਵਿਸ਼ਵਾਸ ਦੇਣ ਦੀ ਲੋੜ ਹੈ। ਮੈਂ ਕਹਾਂਗਾ, 'ਬੇਟਾ, ਤੂੰ ਸਾਰਾ ਸਾਲ ਖੇਡੇਗਾ। ਜੇ ਤੂੰ ਇੱਕ ਦੋ ਵਾਰ ਅਸਫਲ ਹੋ ਜਾਂਦਾ ਹੈਂ, ਤਾਂ ਠੀਕ ਹੈ। ਬੱਸ ਆਪਣਾ ਖੇਡ ਦਿਖਾ।' ਜਿਵੇਂ ਅਭਿਸ਼ੇਕ ਸ਼ਰਮਾ ਨੂੰ ਭਾਰਤ ਵਿੱਚ ਖੁੱਲ੍ਹ ਕੇ ਖੇਡਣ ਦੀ ਇਜਾਜ਼ਤ ਹੈ, ਉਸੇ ਤਰ੍ਹਾਂ ਸੈਮ ਨੂੰ ਵੀ ਉਹੀ ਆਜ਼ਾਦੀ ਦਿੱਤੀ ਜਾਣੀ ਚਾਹੀਦੀ ਹੈ। ਉਸਨੂੰ ਦਬਾਅ ਵਾਲੇ ਮੈਚਾਂ ਵਿੱਚ ਦੌੜਾਂ ਬਣਾਉਣ ਦੀ ਲੋੜ ਹੈ। ਪੀਐਸਐਲ ਵਿੱਚ ਦੌੜਾਂ ਬਣਾਉਣਾ ਇੱਕ ਗੱਲ ਹੈ, ਪਰ ਅਸਲ ਖੇਡ ਵੱਡੀਆਂ ਟੀਮਾਂ ਦੇ ਖਿਲਾਫ ਹੈ।"
ਜੇਕਰ ਮੈਨੂੰ ਤਿੰਨ ਸਾਲ ਮਿਲ ਜਾਣ, ਤਾਂ ਮੈਂ ਕਰ ਸਕਦਾ ਹਾ ਬਦਲਾਵ
ਅਖ਼ਤਰ ਦਾ ਮੰਨਣਾ ਹੈ ਕਿ ਜੇਕਰ ਉਸਨੂੰ ਤਿੰਨ ਸਾਲ ਅਤੇ ਪੂਰਾ ਸਮਰਥਨ ਦਿੱਤਾ ਜਾਵੇ, ਤਾਂ ਉਹ ਪਾਕਿਸਤਾਨ ਕ੍ਰਿਕਟ ਦਾ ਚਿਹਰਾ ਬਦਲ ਸਕਦਾ ਹੈ। ਉਸਨੇ ਕਿਹਾ, "ਜੇ ਮੈਨੂੰ ਤਿੰਨ ਸਾਲ ਦਿੱਤੇ ਜਾਣ ਅਤੇ ਟੀਮ ਦੀ ਵਾਗਡੋਰ ਦਿੱਤੀ ਜਾਵੇ, ਤਾਂ ਮੈਂ ਹਰ ਖਿਡਾਰੀ ਨੂੰ ਆਤਮਵਿਸ਼ਵਾਸ ਦੇਵਾਂਗਾ। ਬੱਚਿਆਂ ਨੂੰ ਭਰੋਸਾ ਦਿੱਤਾ ਜਾਵੇਗਾ ਕਿ ਭਾਵੇਂ ਉਹ ਅਸਫਲ ਹੋ ਜਾਣ, ਉਨ੍ਹਾਂ ਨੂੰ ਹਟਾਇਆ ਨਹੀਂ ਜਾਵੇਗਾ। ਇਹ ਆਤਮਵਿਸ਼ਵਾਸ ਦੀ ਘਾਟ ਹੈ ਜੋ ਸਾਡੀ ਟੀਮ ਨੂੰ ਦਬਾਅ ਹੇਠ ਢਹਿ-ਢੇਰੀ ਕਰ ਦਿੰਦੀ ਹੈ।"
ਅਖਤਰ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਉਸ ਦੇ ਇਸ ਸਮੇਂ ਛੋਟੇ ਬੱਚੇ ਹਨ, ਇਸ ਲਈ ਉਹ ਲੰਬੇ ਸਮੇਂ ਲਈ ਕੋਈ ਵੀ ਜ਼ਿੰਮੇਵਾਰੀ ਲੈਣ ਲਈ ਤਿਆਰ ਨਹੀਂ ਹੈ, ਪਰ ਜੇਕਰ ਉਸਨੂੰ ਮੌਕਾ ਮਿਲਦਾ ਹੈ ਅਤੇ ਹਾਲਾਤ ਸਹੀ ਹੁੰਦੇ ਹਨ, ਤਾਂ ਉਹ ਜ਼ਰੂਰ ਬਦਲਾਅ ਲਿਆਉਣ ਦੀ ਕੋਸ਼ਿਸ਼ ਕਰੇਗਾ।